تمهيد/

‏( ‏ اللقلق من الطيور احادية الشريك ، طيور اللقلق بتختار شريك واحد فقط بتتزاوج معاه طول فترة حياتها و مش بينفصلوا او بيغيروا شركاء التزاوج بتوعهم طول عمرهم و حتي احيانا بعد موت الشريك. كذلك، اللقلق من الطيور المهاجرة اللي بتنقل مناطقها بين الصيف و الشتاء.)

= القصة

‏سنة 1993 اثناء ما راجل كرواتي عجوز كان بيصطاد.. شاف طائر لقلق - حاجة شبه البجعة كده - مصاب نتيجة لبعض الصيادين اللي ضربوا عليه نار و هما بيصطادوا.

‏الراجل اخد الطائر عنده البيت و قرر يراعيه لحد ما يخف.

‏اتضح ان الطائر ده كان انثي ف الراجل قرر يسميها ميلينا ، لكن حصلت مشكلة

‏بعد ما عمنا ضمد جراح ميلينا واكلها و عالجها و خفت الحمد لله اتضح ان الطلق الناري عمل مشكلة في جناحها و سبب ليها اعاقة و ميلينا خلاص فقدت القدرة علي الطيران.

‏ف الراجل العجوز قرر يكمل الاعتناء بيها و بني ليها عش فوق سطح البيت و اعتبرها زي بنته بالظبط لحد سنة 2001

‏الراجل العجوز كان هو اللي بيعتني ب ميلينا و يروح يصطاد سمك ليها و يأكلها و تركب معاه في عربيته و يتفسحوا كل يوم مع بعض و هي عايشة في العش بتاعها فوق بيته.

‏سنة 2001 بيظهر لقلق تاني في السما فوق بيت الراجل ، المرة دي ذكر ، و يبدأ يتقرب من ميلينا و يراعيها.

‏كل يوم الطائر الجديد ده يروح يصطاد سمك ل ميلينا و يأكلها و يقعد معها ، ف الراجل فهم ان ميلينا تقريبا كده بتحب ف قرر يكبر العش اللي فوق السطوح بتاعه و يسمي الطائر الجديد حبيب ميلينا " كلابتان ".

‏كلابتان بيقضي الوقت كله مع ميلينا و يراعيها لحد ما في يوم في اخر الخريف فجأة بيختفي

‏اختفاء كلابتان المفاجئ ده بيأثر علي ميلينا بشكل كبير ، بتبدأ ترفض الاكل و وزنها ينزل و حالتها الصحية بتتأثر يوم بعد يوم.

‏الراجل بيحاول معاها ، يأكلها شوية .. يخرجها تتمشي شوية لحد ما صحتها بتتحسن بس بردو مش بترجع لطبيعتها المرحة الاولي.

‏لحد يوم في أول الربيع؛ فجأة .. كلابتان !

‏كلابتان كان مشارك في موسم الهجرة و رجع؛ كان مهاجر فين ؟ جنوب أفريقيا !

‏طيور اللقلق بتهاجر كل سنة من شرق اوروبا و تبعد عن شتاء اوروبا الصعب و تروح اقصي قارة افريقيا في جنوب افريقيا و ترجع تاني في صيف اوروبا ، كل سنة علي الوضع ده ، بس ميلينا مش بتطير.

‏الحقيقية ان كلابتان اساسا كان بيبقي من أخر طيور اللقلق اللي بتهاجر من اوروبا كل سنة في الخريف و من اوائل اللي بيوصلوا في الربيع ، عشان بيقضي كام يوم زيادة مع ميلينا و يراعيها.

‏بيسافر 13 ألف كيلو متر و يعدي خط الاستواء مرتين في السنة، بس بيرجع بردو لعش ميلينا.

‏الموضوع بيستمر كتير ؟ اه جدا.

‏لحد 2017 فجأة كلابتان مبيظهرش لحد شهر ابريل ، و مفيش اي اخبار عنه.

‏ف الراجل العجوز بيدور علي معلومات و يشوف طريق هجرة الطيور لقي انها بتعدي من لبنان ، و كل سنة بيتم التعامل مع مسار هجرة الطيور هناك انه مهرجان للصيد.

‏كل سنة حوالي 2 مليون طائر مهاجر بيتم اصطيادهم في رحلتهم

ف الراجل بيقرر انه يجمع الريش اللي كلابتان سابه وراه قبل ما يهاجر و استخدمه في كتابة رسالة لرئيس لبنان في وقتها عن قصة ميلينا و كلابتان و المصير السيئ اللي كلابتان غالبا واجهه في رحلة الهجرة و الصيد.

‏رئيس لبنان بيتأثر بالرسالة و القصة و بيمرر سلسلة من القوانين اللي بتحمي الطيور المهاجرة و بيغير قوانين الصيد و الحفاظ علي الحياة البرية، بس كلابتان لسه مختفي.

‏لحد ما في يوم في اخر الربيع في اواخر موسم الهجرة بيظهر طائر في السما فوق بيت الراجل؛ مرهق ، مصاب ، مغطي بالجروح ، مسافر 13 ألف كيلو متر بس وصل .. كلابتان بيرجع تاني العش مرة تانية و يوصل ل ميلينا لسنة تانية كمان.

‏علي مدار علاقتهم اللي استمرت 20 سنة ميلينا و كلابتان انجبوا أكتر من 60 فرخ كلهم كانوا بيهاجروا و يسيبوا العش كل سنة في رحلة هجرة اللقلق بس محدش بيرجع غير كلابتان كل سنة في الربيع.

‏في شهر يوليو 2021 ميلينا بتموت بسبب السن ، موتة طبيعية غير متوقعة لطائر مصاب و مش بيعرف يطير.

‏كلابتان كان موجود معها وقت موتها في أخر لحظات ليهم مع بعض.

‏2021 كمان كانت اخر سنة بيرجع فيها كلابتان للعش ، الراجل الكرواتي العجوز - اسمه فوكيتش - قال انه يتمني رجوع كلابتان مرة تانية للعش و انه يشوفه و كده.

‏بس الحقيقية يعني ان كلابتان معندهوش سبب للرجوع لنفس العش ده تاني خلاص بعد رحيل ميلينا.